Partia e Lirisë ka reaguar në lidhje me nismën e re të qeverisë për të konfiskuar ndërtimet pa leje. Në një reagim ish-deputetja dhe Sekretarja për Marrëdhëniet me Publikun në këtë forcë politike, thotë se kjo është një praktike e re, “që nuk synon asgjë tjetër veç shtrëngimin e qytetarëve, që në këmbim të legalizimit, të japin votën”.
Sipas saj, kjo është një formë tjetër e vjedhjes së votave nga Rama, por shqiptarët thekson ajo nuk mashtrohen më. “Fundi të ka ardhur, kanosja vetëm sa shton urrejtjen ndaj teje!”, shkruan Caka.
Reagimi i Silva Cakës
Praktikë e re: “Jep votën për Rilindjen, legalizo ndërtesën”.
Nisma e re e Qeverisë për konfiskimin e ndërtimeve pa leje, me qëllim fitimin nuk synon asgjë tjetër veç shtrëngimin e qytetarëve, që në këmbim të legalizimit, të japin votën.
E tillë ishte edhe praktika më parë, deri sa ua nxori bojën përgjimi i Artan Lames ku thoshte: mashtrojini deri në zgjedhje, merrjani votën, se asnjë ndërtesë nuk do legalizohet.
Mirëpo, meqë qytetarët nuk e hanë më këtë mashtrim, atëherë Rama nxjerr formën tjetër të vjedhjes se votave: shtrëngimin!
Shqiptarët nuk mashtrohen më, as nga Rama, as nga Lamja e as nga askush.
Fundi të ka ardhur, kanosja vetëm sa shton urrejtjen ndaj teje!